अहमदनगर : आपल्याविरुद्ध दाखल केलेला गुन्हा मागे घ्या, या मागणीसाठी घरात शस्त्रासह शिरलेल्या आरोपीने घरातील मुलीच्या डोक्यावर शस्त्र रोखून तिला ओलीस ठेवले होते. मुख्य आरोपी बडतर्फ पोलिस अधिकारी असल्याने त्याला पोलिसांची कार्यपद्धती माहिती अगोदरपासूनच होती. त्याच्या तावडीतून घरात अडकलेल्या कुटुंबाची सुरक्षित सुटका करणे अन् त्याला जेरबंद करणे हे मोठे आव्हान पोलिसांसमोर होते.
दहशतवादी वापरतात, तशीच पद्धत त्याने अवलंबली होती. त्यामुळे वरिष्ठ पातळीपर्यंत सूत्रे हलली. ही अपहरणाची मोहिम फत्ते करण्यासाठी तयार करण्यात आलेल्या ‘फोर्स वन’ ला पाचारण करण्यात आले.
मात्र, तोपर्यंत पोलिस उपअधीक्षक संदीप मिटके आणि पोलिस निरीक्षक राजेंद्र इंगळे यांनी स्वत:चा जीव धोक्यात घालून ही मोहिम अगोदरच फत्ते केली.
डिग्रज (ता. राहुरी) गावात गुरुवारी राबविण्यात आलेले हे कठीण मोहिम कशी पार पडली, याचा आता तपशील समोर आला आहे. नाशिक विभागाचे पोलिस उपमहानिरीक्षक डॉ. बी. जी. शेखर पाटील यांच्या हस्ते ही कामगिरी फत्ते करणाऱ्या पोलिस पथकाला बक्षिसे देण्यात आली. यावेळी शेखर आणि पोलिस अधीक्षक मनोज पाटील यांनी या मोहिमेची माहिती दिली.
पुण्यातील बडतर्फ सहायक पोलिस निरीक्षक सुनील लोखंडे (मूळ रा. नाव्हारा, ता. शिरूर) याने शस्त्रांसह ड्रिगजमधील एका घरात प्रवेश मुलीला ओलीस ठेवले होते. त्याला जेरबंद करण्यात यश आले आहे.
त्याच्याकडून दोन गावठी शस्त्र आणि काडतुसे हस्तगत करण्यात आली आहेत. मात्र, त्याला पकडण्यासाठी पोलिसांनी कौशल्य आणि धैर्य या दोन्ही मार्गांचा वापर करावा लागला. यामुळे आरोपीला पकडण्यात यश आले आहे.
शेखर म्हणाले की, संबंधित कुटुंबाशी आरोपी लोखंडे याचा व्यवहाराच्या निमित्ताने जुना परिचय आहे. लोखंडे इस्टेट एजंट आहे. काही दिवसांपूर्वी त्याच्याविरुद्ध या महिलेने खंडणीसाठी धमकावल्याची फिर्याद दिली. ती मागे घेण्यासाठी त्याने हा नियोजनबद्ध गुन्हा केला.
आरोपी रात्री या महिलेच्या घराबाहेर दबा धरून बसला होता. सकाळी कुटुंब जागे झाल्यानंतर मुलगा कचरा टाकण्यासाठी बाहेर गेला. त्याला पकडून डोक्याला शस्त्र लावत आरोपी घरात शिरला. याची माहिती मिळाल्यावर डीवायएसपी मिटके आणि राहुरीचे पोलिस आणि नंतर गुन्हे शाखेचे पोलिस तेथे गेले.
आरोपी प्रशिक्षित पोलिस अधिकारी आणि त्याच्याकडे शस्त्र असल्याने त्याच्यापासून घरात अडकलेल्या कुटुंबीयांना धोका होता. त्यामुळे थेट झडप घालणे अशक्य होते. त्यामुळे त्याला बोलण्यात गुंतविण्यात आले. त्यावर तो दरवाजा उघडण्यास तयार झाला. मात्र, पोलिसांनी शस्त्रे बाहेर ठेवून आत यावे, अशी अट त्याने घातली होती.
पोलिसांनी ती अट मान्य करून मिटके, इंगळे व काही पोलिस आत गेले. आपल्याविरुद्ध दाखल झालेला गुन्हा मागे घ्या, ही त्याची मागणी कायम सुरु होती. या वेळी पोलिसांच्या वरिष्ठ अधिकाऱ्यांशीही बोलला.
पोलिसांनी त्याला खोटे खोटे आश्वासन देऊन पाहिले. मात्र, हा अधिकार तुम्हाला नाही, तुमच्या वरिष्ठ अधिकाऱ्यांशी संवाद करून द्या, असे तो सांगत होता. मधल्या काळात त्याने पत्नीशी संपर्क केला. आपण येथे आलेलो असून जीवाला काही बरेवाईट झाले तर पोलिसांना सोडू नको, असे त्याने आपल्या पत्नीला फोनवरून सांगितले. तसेच मोहिमेवर असलेल्या अधिकाऱ्यांची नावेही सांगितली.
त्यानंतर आरोपीचा पोलीस अधीक्षकांशी संवाद साधून देण्याचे ठरले. मिटके यांनी पोलीस अधीक्षक मनोज पाटील यांना फोन लावून दिला. पाटील यांनीही आरोपीला समजावण्याचा प्रयत्न करीत बोलण्यात गुंतविले. एका क्षणी तो बेसावध झाला. ही संधी साधून मिटके यांनी मुलीला दूर होण्यास खुणावत आरोपी लोखंडे याच्यावर झडप घातली.
त्याचा हात पकडून शस्त्राचे तोंड जमिनीकडे झुकविले. त्यामुळे लोखंडे याने चालविलेली गोळी जमिनीवर आदळली. तोपर्यंत बाकीच्या अधिकाऱ्यांनी झडप घालून आरोपीला जेरबंद केले आणि कुटुंबाची सुटका झाली.
Post a Comment